ৰূপালী পৰ্দা - অসমীয়াৰ সুখ-দুখ

ইউনিকোডত প্ৰকাশিত অনলাইন দৈনিক

xukhdukh.com

Post Top Ad

Responsive Ads Here

ৰূপালী পৰ্দা

Share This
মি: ৰাজকুমাৰৰ চিনেমাঃ ছবিজগতত নতুন শৈলী?
ডাঃ উদ্দীপ তালুকদাৰ
 ওহোঁ, এই্ আলোচনাটো মুঠেই খুহুটীয়া নহয়। আচলতে বেছ ছিৰিয়াছ। মোৰ লগৰ এজনে এই কামটোৰ নাম দিছে 'মানসিক স্বমেহন' (!!) সেই সতৰ্কবাণী শুনাই আগবাঢ়িছোঁ।

হঠাতেই কোনোবাই ইউটিউবত চিনেমা এখনৰ লিংক দি ক'লে, 'চাবিচোন, বাগৰি যাবি'। "টেৰ'ৰিষ্ট এণ্টাৰ মাই হাউছ"-ৰ তিনিটামান মিনিট চিনেমাখন চোৱাৰ পাছত মই হতভম্ব! কি বস্তু এইখন।। তেনেকুৱা বস্তু এখন সঁচাকৈয়ে কোনোবাই টকা-পইচা খৰচ কৰি নিৰ্মাণ কৰিছে বুলি ভাবিবলৈও ভয় লাগে। কিন্তু মই ভয় খালেও তেনেকুৱা বস্তু এখন-দুখন নহয়, চাৰিখন ওলাল। এই কেইখনৰ নিৰ্মাতা-নিৰ্দেশক-অভিনেতা, গায়ক, সংগীতকাৰ সকলো মি: ৰাজকুমাৰ। তেখেত অসমীয়া, ঘৰ গুৱাহাটীৰ বৰঝাৰ বিমানবন্দৰৰ দাঁতিকাষৰীয়া অঞ্চলৰ ।

প্ৰথম ধাক্কাটো পাৰ হোৱাৰ পাছত চিনেমাকেইখনৰ বিষয়ে আন ধৰণে ভাবি চাবলৈ মন গ'ল। চিনেমা কেনে কোৱা উচিত, কেনে চিনেমা ভাল চিনেমা আদিবোৰ।  আমি কিছুমান চিনেমা চাই, ক'ৰবাত অলপ-চলপ পঢ়া-শুনা কৰি সংজ্ঞাবোৰ শিকিছোঁ। কিন্তু চিনেমা মানে আমি ভাল বুলি কোৱা বিধৰে হ'ব লাগিব বুলি কোনো কথা নাই। বৰং আমাৰ চাৰিওফালৰ মানুহৰ কথা-বাৰ্তা, কাম-কাজ, জীৱন-শৈলী আদিলৈ চালে আমি চোৱা প্ৰায় প্ৰতিখন চিনেমাকে কেমেৰাৰ বন্দী কৰা একো একোটা গল্পৰ বাহিৰে আন একো বুলি ভবাৰ অৱকাশ নাথাকে। কাৰণ দৈনন্দিন জীৱনৰ মানুহবোৰৰ কোনো ডাষ্টিন হফমেন বা টম ক্ৰুজ নহয়। প্ৰায় কাৰোৰে দেহো এই চিনেমাৰ হিৰোৰ দৰে ফুলা-ফুলা বাইচেপ, ছিক্স পেকৰো নহয়। আমাৰ দৰে সাধাৰণ মানুহবোৰে সাধাৰণ সাধাৰণ কাম কৰে, আৰু অসাধাৰণ কিবা কৰাৰ সপোন দেখে। কিন্তু আমি যোবোৰ সপোন দেখো সেইবোৰো আমাৰ সাধাৰণ মনৰ সপোনহে, গতিকে আমাৰ সপোনবোৰ অসাধাৰণ হ'লেও সেইবোৰ সফল হ'লে আমি আকৌ তাৰে সাধাৰণ কিবায়েই কৰিম। মানুহ বোলা বস্তুটোৱেই তেনেকুৱা।
এবাৰ চিনেমাৰ ছেট-ফৰ্মূলাৰ পৰা ওলাই আহিব পাৰিলে মি: ৰাজকুমাৰৰ চিনেমাৰ কিছুমান নতুন দিশ চকুত পৰে। যেনে, তেওঁৰ প্ৰতিখন চিনেমাৰে ডাইলগ। একেবাৰে খাৰাংখাচকৈ আমি সদায়ে লগ পোৱা মানুহবোৰে যেনেকৈ কথা পাতে, তেনেকুৱা কথাৰেই ডাইলগ। অৱশ্যে ৰাজকুমাৰে ভাষাত অলপ 'গৰম' ভাৱ শুনিবলৈ কিছু হিন্দী ডাইলগ নমৰাকৈ থাকিব নোৱাৰে। সেইখিনিও আমাৰ টিপিকেল অসমীয়া হিন্দী। গতিকে তাকো অদ্ভুত বুলিব নোৱাৰি।

"এনিমেল কিলাৰ"-ত এটা দৃশ্যত মি. ৰাজকুমাৰে নিজৰ ভাল পোৱা ছোৱালীএজনীক গৰু এটা দেখুৱাই গঁড় বুলি ধেমালি কৰাৰ চেষ্টা কৰিছে। তেনেকুৱা ধেমালি আমি সৰু থাকোঁতে কোনোবাজন খুৰা বা মামাই কেতিয়াবা কৰিছিল। ৰাজকুমাৰে নিজে আৰু তেওঁৰ সহ-অভিনেতাসকলে যিদৰে খোজ-কাঢ়ে, বা একশ্যনৰ দৃশ্য কৰে, সেইবোৰ সততে দেখি থকা। ৰাস্তাত যে কেতিয়াবা দুই জোৱানৰ কাজিয়া লাগি যায়, তেতিয়া দঙা ফ্লাইং কিকটো ৰাজকুমাৰে মৰাৰ দৰে হোৱাৰ সম্ভাৱনাই বেছি।

ডাইলগতো কেতিয়াবা মাজে মাজে সৰু হৈ যোৱা, ডাঙৰ হৈ যোৱা, কেতিয়াবা একেটা ডাইলগকে দুবাৰকৈ কোৱা, আদিবোৰো ভালকৈ মন কৰিলে দৈনন্দিনত শুনি থাকিব। সেইফালৰপৰাও ৰাজকুমাৰৰ চিনেমা অত্যন্ত মানে ভয়ানক ধৰণে বাস্তৱ।

অৱশ্যে ৰাজকুমাৰৰ চিনেমাৰ কাহিনীক কোনো প্ৰকাৰেই বাস্তৱৰ আওতালৈ আনিব নোৱাৰি। বাকী চব যিহেতু একেবাৰে সহজ-সৰল, সেয়ে ৰাজকুমাৰে কাহিনীত সংঘাত আনিবলৈ ডাঙৰ ডাঙৰ সমস্যা বাচি উলিয়াব লগীয়া হয়। তাৰ বাহিৰে ৰাজকুমাৰৰ চিনেমাৰ কাম-কাজ ইমানেই বাস্তৱৰ লগত মিলা যে, তাক বাস্তৱৰ পেৰ'ডী যেনহে লাগে।

মোৰ মাজে মাজে ভাৱ হয় ৰাজকুমাৰে যিটো ধাৰাৰ ছবিৰ আৰম্ভণি কৰিছে, সেই ধাৰাটো ভাল কোনো পৰিচালকৰ হাতত পৰিলে চিনেমাৰ নতুন এটা শৈলী হিচাপে পৰিগণিত হ'ব পাৰে। একেবাৰে কৃত্ৰিমতা বৰ্জিত অভিনয় আৰু দৈনন্দিন চালচলন আৰু ভাষা (বিশেষকৈ অসমীয়া ভাষাৰ ক্ষেত্ৰত, কাৰণ চিনেমা-টিভি আদিত যিটো অসমীয়া ভাষা কোৱা হয়, সেইটো অত্যন্ত কৃত্ৰিম। তেনে উচ্চাৰণ আৰু টেম্পো-ৰে কোনো অসমীয়া মানুহেই কথা নাপাতে।)-ৰে নতুন ধাৰাৰ ছবি এখন হ'ব পাৰে।

এই্ শৈলীটো যদি সঁচাকৈয়ে আহে, তেতিয়া কিন্তু ৰাজকুমাৰ-ক ধন্যবাদ এটা দিবলৈ নাপাহৰিব। যদিও মি. ৰাজকুমাৰে নিজেই নজনাকৈ বা সমল আৰু প্ৰতিভাৰ অভাৱৰ বাবে শৈলীটো প্ৰনয়ণ কৰিছে, তথাপি এই শৈলীটোৰ অগ্ৰণী ব্যক্তি হিচাপে তেখেতৰ নাম থাকি যাব।

যদি মোৰ সমল থাকিলহেঁতেন, তেন্তে মি. ৰাজকুমাৰক নাম-ভূমিকাত লৈ 'ডন কুইক্সোট'-ৰ অসমীয়া ভাৰ্ছন এখন নিৰ্মাণ কৰিলোহেঁতেন।

টোকাঃ তেখেতৰ কথাছবিৰ ইউ-টিউবৰ লিংক সমূহঃ
শেহতীয়া ছবি ছুপাৰ মাষ্টাৰঃ https://www.youtube.com/watch?v=nKK6FB_tkfk
এনিমেল কিলাৰঃ https://www.youtube.com/watch?v=NfxJWdzO8dk

No comments:

Post a Comment

Post Bottom Ad

Responsive Ads Here

Pages