প্ৰৱাসৰ পৰা কাটাৰৰ চিঠি

সহৃদয়তাৰে এখন প্ৰীতি সন্মিলন
ডাঃ ভূপেন শইকীয়া

কাটাৰৰ অসম সমাজৰ এখনি প্ৰীতি সন্মিলন আৰু সংগীত সন্ধিয়া ৬জুন শুকুৰবাৰে ডোহাৰ গ্ৰেণ্ড কাটাৰ পেলেচ হোটেলত অনুষ্ঠিত হয় ৷ এক বুজন সংখ্যক ন-পুৰণি সদস্যৰ উপস্থিতিৰে, কণকণ মইনাহঁতৰ কল্লোল আৰু উলহ-মালহৰ মাজেৰে এক ঘৰুৱা, সৌহাৰ্দ্যপূৰ্ণ পৰিবেশৰ মাজত সংগীতানুষ্ঠানটি সন্ধিয়া ৭বজাত আৰম্ভ হৈ নিশা ১১বজাত সামৰণি পৰে৷ সকলোৱে সুস্বাদ্য খাদ্য আৰু পৰিতৃপ্ত মনলৈ ঘৰমুৱা হোৱাটোৱেই হ'ল পৰম আনন্দৰ বাৰ্তা৷ এনেয়ো দেশতেই হওক বা বিদেশতেই হওক জেঠৰ ২২দিন অতিবাহিত হোৱাত 'বহাগী বিদায়' পতাৰ আমি বহুতেই পক্ষপাতী নহয়৷ কিন্তু নাম যিয়েই দিয়া নাযাওক এনেদৰে মাজে-সময়ে সদস্যসকল একত্ৰিত হোৱাটো আৱশ্যকীয়। কাৰণ হিন্দীত এনেয়ে নকয় নহয় :... हर मुलाकात ज़रूरी होता हैं दोस्ती को बाहाल रखने के लिये !

গোলাপক যি নামেৰেই মাতক কিয় সি সদায় গোলাপৰ স্বভাৱেই ব্যক্ত কৰিব৷ একেদৰে আজিৰ অনুষ্ঠানক 'বহাগী বিদায়' বোলক বা 'বসন্ত উৎসৱ' বোলক - আমাৰ প্ৰকৃত উদ্দেশ্য-লক্ষ্য একেটাই - এই এমুঠি প্ৰবাসী অসমীয়াৰ মাজত একতাৰ এনাজৰীডাল অধিক সুদৃঢ় কৰা ৷ নিজ নিজ কৰ্মক্ষেত্ৰৰ অশেষ ব্যস্ততাৰ মাজতো সময় উলিয়াই আজিৰ অনুষ্ঠানৰ অংশীদাৰ হোৱা প্ৰতিজন প্ৰবাসী অসমীয়াই ধন্যবাদৰ পাত্ৰ৷ জেষ্ঠ-কনিষ্ঠই অংশগ্ৰহণ কৰা আজিৰ অনুষ্ঠানত আছিল শ্লোক পাঠ, ভূপেন্দ্ৰ সংগীত, আধুনিক গীত, বিহুসুৰীয়া গীত, আধুনিক নৃত্য, বিহু নৃত্য,অসমীয়া আৰু ফৰাচী কবিতা আবৃত্তি, কৌতুক, সমজুৱাৰ বিহু আদি ৷ গোটেই অনুষ্ঠানটি বিগত ৰঙালী বিহুৰ উৎসৱৰ দৰেই এইবাৰো নিয়াৰিকৈ পৰিচালনা কৰি নিয়ে এংকৰ জাফৰিন হাচানে৷ এই মুহূৰ্তত আমি উপলদ্ধি কৰিছোঁ সেইসকলৰ মৰ্মবেদনা যি একান্ত ইচ্ছা থকা সত্বেও অনিবাৰ্য কাৰণত কোনো পধ্যেই কৰ্মস্থলী এৰি আহি আমাৰ মাজত উপস্থিত হবহি নোৱাৰিলে৷ শাৰীৰিক অসুস্থতাৰ ফলতো আহিব নোৱৰাসকলৰ আশু আৰোগ্য কামনা কৰিলোঁ৷
 

 আজিৰ অনুষ্ঠানৰ মাজতে আমাৰ এজন জেষ্ঠ সদস্য পলাশ দাসে সমূহ ৰাইজৰ আগত এটি অতি সজ পৰামৰ্শ দাঙি ধৰিছে ৷ তেওঁ গোহাৰি জনাইছে যে কাটাৰৰ অসম সমাজে অসমৰ কেইজনমান মেধাবী ছাত্ৰক শৈক্ষিক দিশত আগবাঢ়িবলৈ যথাসাধ্য সহযোগ কৰিব লাগে৷ শ্ৰীদাসৰ এই বিচাৰ কেনেকৈ কাৰ্যকৰী কৰিলে ভাল হব সেই বিষয়ে কাটাৰ অসম সমাজৰ সকলোৰে পৰা দিহা পৰামৰ্শ বিচৰা হ'ল৷ 

আজিৰ সংগীতানুষ্ঠানৰ মাজতেই যোৱা ৪এপ্ৰিলত কাটাৰত পালিত ৰঙালী উৎসৱত ঐকান্তিকতাৰে কাম কৰি অনুষ্ঠান সাফল্যমণ্ডিত কৰাত অৰিহণা যোগোৱা 'নেপথ্যৰ নায়ক সকলক' ৰাইজৰ আগত চিনাকী কৰাই যৎসামান্য ৰাজহুৱা সম্বৰ্ধনা জনোৱা হয়৷বিশেষভাৱে শলাগৰ পাত্ৰ হয় ধেমাজিৰ নৰহ দম্পত্তি যাৰ তেজৰ শিৰা-উপশিৰাত বিহু প্ৰবাহমান৷সদ্য সন্তানসম্ভৱা শ্ৰীমতী মৌচুমী নৰহক ৰাইজে আশীৰ্বাদ আৰু শুভকামনাৰে উপচাই তোলে৷মৌচুমীৰ এটা বাক্যই প্ৰতিজন অসমীয়াৰ অন্তৰত হেন্দোলনি তুলিব - "ঢোলৰ মাত শুনিলে নানাচি কেনেকৈ থাকোঁ" ! 

আমাৰ এজন সক্ৰিয় আৰু মৰমৰ সদস্য ফৰাচী ভাষাৰ শিক্ষক চাহানুৰ আলিয়ে চিগাংপুৰলৈ কৰ্মস্থলী সলনি কৰাৰ খবৰো আজি নিশ্চিত হোৱাত তেওঁক ২৭জুন শুকুৰবাৰে বিদায় সম্ভাষণ জনাবলৈ আজি সিদ্ধান্ত লোৱা হয়৷ চাহানুৰক নিশ্চয় চিংগাপুৰ অসম চচাইটিৰ ধীৰাজ কলিতা আৰু গোটৰ আন সদস্যসকলে আদৰি লব৷ আকৌ জুলাই মাহৰ আৰম্ভণিতেই আমি কাটাৰ অসম সমাজৰ সকলোৱে পবিত্ৰ ইফটাৰ উপলক্ষে সমবেত হোৱাৰ কথা৷ এইদৰেই আমি সকলো প্ৰবাসী অসমীয়াই এটা পৰিয়ালৰ সদস্যৰ দৰে পৰস্পৰৰ মাজত সদ্ভাৱ বৰ্তাই ৰাখি আগবাঢ়ি যাব লাগিব৷