AXD 221: 28TH MAY 2013

অসমীয়াৰ সুখ দুখ

প্ৰথম বছৰ ২২১তম সংখ্যাঃ ২৮মে’ ২০১৩

সামাজিক যোগসূত্ৰৰ মঞ্চত অসমীয়া জনজীৱনৰ বাৰ্তাবাহক

আজিৰ বিশেষ নিবেদন

১. অভিযান্ত্রিক শিক্ষাত স্বাৱলম্বিতাঃ সময়ৰ আহ্বান, লেখকঃ টুৱাৰাম দত্ত
২. অসমীয়া কিয় আজি ধোদৰ পচলা? ধ্ৰুৱজ্যোতিৰ মহাদুষ্ট পদ্য
৩. ফেচবুক বিশেষ ৰসাল হিতোপদেশ
৪. জুতি লগা আখলত কলডিলৰ পিটিকা 
৫. ৰেডিঅ’ সুখ দুখৰ পৃষ্ঠাত ইন্দুকল্প শইকীয়াৰ নতুন গান 

সুখৰ খবৰঃ

১.কটন কলেজৰ ১১৩তম প্ৰতিষ্ঠা দিৱস উদযাপনঃ প্ৰাক্তন কটনিয়ানৰ মিলনেৰে উখল-মাখল হ’ল চৌহদ ৷ অন্যান্য বৰ্ণাধ্য কাৰ্যসূচীৰ লগতে শিল্পী মনজিৎ ৰাজখোৱাৰ বেটুপাত আৰু শিল্প-কৰ্মৰ অনুষ্ঠিত হ’ল প্ৰদৰ্শনীৰ ৷

২. অসমত ক্ৰমাৎ দুস্প্ৰাপ্য হৈছে মেজাংকৰি, তাৰ বিপৰীতে এই সঁচেৰে কৰ্ণাটকত ব্যৱসায়িক খেতিয়ে লাভ কৰিছে উদ্যোগৰ ৰূপঃ উৎপাদিত প্ৰতি লিটাৰ তেলৰ মূল্য প্ৰায় ৯০০টকা ৷

৩. চিবিএছই উচ্চতৰ মাধ্যমিকৰ ফলাফল ঘোষণাঃ পূৰ্বোত্তৰৰ সফলতাৰ হাৰ ৭৭ শতাংশ, ছাত্ৰীৰ সফলতাই পালে আধিপত্য ৷

৪. লক্ষ্য পৌৰ নিগম নিৰ্বাচনঃ গুৱাহাটীৰ সমস্যাৰ বাবে বিশেষ পেকেজৰ ব্যৱস্থা কৰিব বুলি প্ৰকাশ কৰিলে মুখ্যমন্ত্ৰীয়ে 

৫. ভেটী লৈ নিজ কাৰ্যালয়তে আটক হ’ল বিদ্যুত উপ-সংমণ্ডল বিষয়া গকুল দলেঃ চিপাঝাৰৰ এনে ঘটনাক উল্লাসিত হ’ল দুৰ্নীতিবিৰোধী ৰাইজ৷

৬. গুৱাহাটীৰ পৌৰ সভাৰ নিৰ্বাচনঃ প্ৰাৰ্থীত্বৰে মনোনয়ন দাখিল কৰিলে সৰ্বমুঠ ৫৫৯গৰাকীয়ে ৷

৭. আঘাতপ্ৰাপ্ত, পৰিত্যক্ত কুকুৰৰ শুশ্ৰূষাৰ বাবেই বহুজাতিক কোম্পানীৰ চাকৰি ত্যাগ কৰি আন এক পথ দেখুৱালে দিল্লীৰ ছিমি মলহোট্ৰাইঃ মুঠ ৩৯টা কুকুৰক উদ্ধাৰ কৰি চিকিৎসা তথা আশ্ৰয় প্ৰদানেৰে জীৱ-জন্তুৰ প্ৰতি এনে ত্যাগৰ বাবে তেখেতে লাভ কৰিলে সংবাদ শিৰোনামা৷

চিন্তনীয় খবৰঃ

১. মহানগৰী ও উপকণ্ঠ অঞ্লত ব্যাপক হাৰত জনজাতি ব্লক আৰু বেল্টৰ মাটি অনিয়েমেৰে গতাইছে অজনজাতিকঃ ৰাজহ বিভাগৰ এনে কেলেংকাৰীয়ে আনিব বিটিএডিৰ দৰে ভয়াবহ সংঘাত অচিৰেই, এই শংকা প্ৰকাশ কৰিলে সংবাদ মাধ্যমে ৷

২. মেডিকেলৰ বাচনি পৰীক্ষাত ভুৱা পৰীক্ষাৰ্থীঃ শিলচৰত আৰু এজন প্ৰৱঞ্চক গ্ৰেপ্তাৰ ৷

৩. অপৰাধী ঘাতকৰ ৰময্ভূমিত পৰিণত হৈছে নগাঁওঃ গেৰুৱাআটীত দুৰ্বত্তৰ গুলীত ৩জন নিহত, আহত ৪৷ ডকাইত, মাফিয়াৰ মাজত অবৈধ অস্ত্ৰৰ পয়োভৰে শংকিত কৰিছে সাধাৰণ জনতাক৷

৪. ৰাজীৱ ভৱনত প্ৰকাশ কৰিলে অংকৰ হিচাবঃ গগৈ-কলিতা-ঘাটোৱাৰ-হাচমিয়ে একেলগে ক’লে, ৰাজ্য সভাৰ দুয়োখন আসন বিজয়ী হব কংগ্ৰেছী প্ৰাৰ্থী 

৫. গুৱাহাটীত কেন্দ্ৰীয় চৰকাৰৰ ফ্লেগশ্বিপ আঁচনিৰ পৰ্যালোচনা সভাঃ কিছু বিধায়কক সীমা চেৰাই নাযাবলৈ সকিয়নি দিলে মুখ্যমন্ত্ৰীয়ে ৷

৬. ১৯৯৭চনতে সংঘটিত লোমহৰ্ষক হত্যাৰ গোচৰত মৰিগাঁৱৰ আদালতৰ ৰায়ঃ তিনি অভিযুক্তক যাৱজ্জীৱন কাৰাদণ্ড৷

৭, এইবাৰ ধৰা গুৱাহাটীত পৰিল নয়দাৰ নতুন প্ৰৱঞ্চকঃ পলিচি নম্বৰ সংগ্ৰহ কৰি লাইফ ইন্সুৰেঞ্চৰ পৰা উলিয়াইছিল আনৰ টকা ৷

৮. মহানগৰীৰ কিশোৰী ডিমাপুৰত হ’ল উদ্ধাৰঃ ধৃত নাৰী ব্যৱসায়ী মহিলাই উন্মোচিত কৰিলে দেহ সৰবৰাহৰ গোপন শৃংখল ৷

৯. যোৰহাটৰ নিমাতীৰ খহনীয়া প্ৰতিৰোধত ব্যাপক অনিয়মঃ নিম্নমানৰ জিঅ’বেগেৰে মন্ত্ৰীৰ ঘনিষ্ঠ ঠিকাদাৰে লুণ্ঠন চলাইছে বুলি অভিযোগ তুলিলে অসম জাতীয়বাদী যুৱ ছাত্ৰ পৰিষদে ৷

ৰাষ্ট্ৰীয়-আন্তঃৰাষ্ট্ৰীয়ঃ

১. ছত্তীশগড়ত মাওবাদীৰ পুনৰুত্থানে শংকিত কৰিছে কেন্দ্ৰকঃ বিগত বৰ্ষ সমূহত কূটাঘাত কমি অহাৰ বিপৰীত ছবিকৈ গৃহ মন্ত্ৰালয়ৰ মজিয়া উত্তপ্ত ৷

২. মাওবাদীৰ আক্ৰমণত আহত কংগ্ৰেছী নেতা ভি চি শুক্লাক খবৰ কৰিলেগৈ লালকৃষ্ণ আদৱানিয়েওঃ এনে আত্ৰমণৰ পৰিপেক্ষিতত স্থগিত ৰাখিলে বিজেপিৰ জেল ভৰ’ আন্দোলন আৰু আম আদমি পাৰ্টিয়েও দিলে গৰিহণা ৷

৩. উত্তৰ প্ৰদেশত জলাশয়ত বাগৰি পৰিল যাত্ৰীবাহী বাছঃ শিশু-মিহালাসহ ২১জনৰ প্ৰাণনাশ আৰু বৃহৎ সংখ্যক আহত হোৱাৰ দুখৰ খবৰ ৷

৪. বিধংসী সামুদ্ৰিক বতাহে বিধ্বস্ত কৰা ওক্লাহ’মা পালেগৈ আমেৰিকাৰ ৰাষ্ট্ৰপতিঃ নাগৰিক সকললৈ আগবঢ়ালে সহায়ৰ হাত ৷

৫. পুনেৰ য়েৰৱাদা কাৰাগাৰত সঞ্জয় দত্তৰ স-শ্ৰম কাৰাদণ্ডঃ পেপাৰ বাইণ্ডিঙৰ কামত ব্যস্ত হোৱাৰ খবৰ৷