সোমবৰীয়া জুতি লগা আখলত

চয়াচচ দি ৰন্ধা কুকুৰা মঙহৰ সুস্বাদ্য ব্যঞ্জন



উপকৰণঃ
প্ৰায় চাৰিশ গ্ৰাম কুকুৰাৰ মাংস (ব্ৰইলাৰ বা থলুৱা )
মিঠাতেল, আলু দুটা, নহৰু ৬ফোটা, আদা এটুকুৰ
গোটা জালুক ৫টা, কেঁচা জলকীয়া ৩টা (স্বাদ অনুসৰি)
নিমখ, হালধি অনুমান অনুসাৰে৷ পাঁচফোৰন অকনমান ৷
মাংসত দিবলৈ মীট মচলা এচামুচমান৷
পিয়াজ ৩-৪ টা তাৰে দুটা ডাঙৰ ডাঙৰকৈ, আৰু বাকীখিনি মিহিকৈ কাটি লওক৷

চয়া চচ  চাৰি টেবুল চামুচ
বিলাহীৰ চচ ২চামুচ ৷
কেৰাহীৰ তলত কম জুই, পানীৰ প্ৰয়োজন নাই৷

ৰন্ধন প্ৰণালীঃ

প্ৰথমে মিঠাতেল অলপ মান দি কেৰাহীখন গৰম কৰি লওক ৷ মিহিকৈ কুটা পিয়াজখিনিৰ সৈতে পাঁচফোৰণটো অলপ ৰঙচুৱা হোৱাকৈ ভাজক৷ মাংসখিনি তাত দি এতিয়া হালধি অকন দি, ভালকৈ ল’ৰাই থাকিব৷ তেলৰ সৈতে ভালকৈ লাগি যোৱা যেন লাগিলে ১ মিনিটমান ঢাকি থওক৷

তাৰ পাছত ঢাকনি খুলি আদা-নহৰুৰ খুন্দি কৰা পেষ্টটো তাত ঢালি দিয়ক, বাকী পিয়াঁজ খিনিও তাতে ঢালি দিয়ক৷ জলকীয়া কেইটা দীঘলে দীঘলে ফালি দি দিয়ক ৷ নিমখ আৰু মীট মচলাকনো দিবলৈ নাপাহৰিব৷

আলুকেইটা দীঘল দীঘল পিচ কৰি তাতে দি দিয়ক ৷
 ভালকৈ ল’ৰাই সকলো মিহলি হোৱাযেন কৰক আৰু আকৌ ১মিনিট মান ঢাকি থওক ৷

এতিয়া অলপ ভাজখোৱা যেন লাগিলে পানীৰ সলনি চয়াচচ চাৰি চামুচ আৰু বিলাহীৰ চচ(মেগী কোম্পানীৰ টমেট আৰু চয়াচচ আমি ব্যৱহাৰ কৰিছো) তাত ঢালি দিয়ক৷

এতিয়া ৮-১০ মিনিট মান তেনেকৈ ঢাকোন মাৰি সিজিবলৈ দিয়ক৷ জুই কমকৈ দি ৰাখিব যাতে, চচখিনি শুকাই গৈ লাগি নধৰে ৷ এনেদৰে মাংস আৰু আলু সিজিচেনে নাই, পৰীক্ষা কৰক৷ চামুচেৰে পিয়াজ অকন তুলি আনি নিমখ হৈছেনে চাই লব আৰু লগতে জুতিটোও চাওক৷

এইদৰে সহজতে চাইনীজ ফ্লেভাৰযুক্ত চচ দি ৰন্ধা অপূৰ্ব সোৱাদৰ ব্যঞ্জন ঘৰতে ৰান্ধি খাব পাৰি ৷ এতিয়া ৰন্ধন হৈ গ’ল যদি পৰিস্কাৰ পাত্ৰত গৰমে গৰমে বাঢ়ি খোৱা টেবুলত পৰিবেশন কৰক  আৰু এই জুতিৰ কথা সকলোকে জনাওক ৷ গোটা জালুক কেইটা খোৱাৰ মাজতে চোবাই দিলে আন এক সোৱাদ পাব পাৰি!

শেহতীয়া ৰেচিপিৰ বাবে তলৰ শিৰোনামাত ক্লিক কৰকঃ
১. তিল দিয়া কুকুৰাৰ মাংস

২. হায়দৰাবাদী দম বিৰিয়ানী আৰু অন্যান্য

৩. পনীৰ মছলা