প্ৰেৰণাময়

প্ৰবাসী অসমীয়াৰ সাফল্যৰ বতৰা

 #ডা০ ভূপেন শইকীয়া

আজিৰ লিখনিৰ যোগেদি নিজৰ অধ্যৱসায় আৰু একাগ্ৰতাৰ ফলত উন্নতিৰ ঢাপত বগাবলৈ সক্ষম হোৱা দুজন অসমীয়া যুৱকক 'অসমীয়াৰ সুখ দুখৰ' পাঠকৰ সৈতে পৰিচয় কৰাই দিব খুজিছোঁ৷নিজৰ পৰিশ্ৰম আৰু সফলতাৰ চাবিকাঠি কি দৰে দুয়ো আয়ত্ত কৰিবলৈ সক্ষম হ'ল সেই বিষয়ে বিতংকৈ নিজ মুখে বহলাই কব আৰু সময়ত সেয়া কাটাৰ অসম সমাজৰ মুখপত্ৰ বা স্মৰণিকাত প্ৰকাশিত হব৷

প্ৰথমেই কম ধুবুৰীৰ চাহানুৰ আলিৰ কথা ৷ পিতৃ কেন্দ্ৰীয় চৰকাৰৰ চাকৰিয়াল হোৱা হেতুকে চাহানুৰে সৰুতে অসম আৰু মেঘালয়ৰ বিভিন্ন ঠাইত পিতৃৰ সৈতে ভ্ৰমিলে৷চাকৰিৰ পৰা অৱসৰলৈ ধুবুৰীত ঘৰবাৰী কৰাত চাহানুৰে তাৰ বি এন কলেজৰ পৰা স্নাতক ডিগ্ৰী লয়৷

কলিকতালৈ আহি এটা ইন্টাৰনেশ্বনেল বেংকৰ চাকৰিত যোগদান কৰি তেওঁ লক্ষ্য কৰে যে বেংকৰ বহুবোৰ নথি পত্ৰ,যোগাযোগ ফৰাচী ভাষাত চলে৷তেওঁ বেংকৰ উৰ্ধতম কৰ্তৃপক্ষক নিজৰ ফৰাচী ভাষা শিকিবলৈ আগ্ৰহ হোৱাৰ কথা ব্যক্ত কৰে৷বেংকে জনায় যে তেওঁ কলিকতাৰ ফৰাচী দূতাবাসৰ যোগেদি ফৰাচী ভাষা শিকিব পাৰিব আৰু লগতে ফ্ৰান্সৰ কলা-সংস্কৃতিৰ বিষয়েও জ্ঞান আহৰণ কৰিব পাৰিব৷নিশাৰ ভাগৰ আজৰি সময়ত চাহানুৰে ফৰাচী অধ্যয়ণ কৰিবলৈ আৰম্ভ কৰিলে আৰু এটা সময়ত পৰীক্ষা দি অন্তৰ্ৰাষ্ট্ৰীয় ডিপ্লমা আয়ত্ত কৰিবলৈ সক্ষম হ'ল৷

ইয়াৰ পিছত চাহানুৰৰ কৰ্মস্থল বাংগালোৰলৈ সলনি হ'ল ৷বাংগালোৰৰ পৰা এইবাৰ ডুবাইলৈ চাহানুৰ আহিল৷ ডুবাইত এমিটি ইউনিভাৰ্চিটি আৰু আন টুৰিজমৰ লগত জড়িত শিক্ষা প্ৰতিষ্ঠানে তেওঁক ফৰাচী ভাষা আৰু ফৰাচী সংস্কৃতিৰ ওপৰত শিক্ষা দিবলৈ আমন্ত্ৰণ জনাব ধৰিলে৷সদ্যহতে চাহানুৰ আলি ড'হাৰ মডাৰ্ণ ইণ্ডিয়ান স্কুলৰ ফৰাচী ভাষাৰ বিষয় শিক্ষক৷তেওঁৰ মতে ফৰাচী ভাষা শিকাৰ পৰা এদিনো থমকি ৰবলগীয়া হোৱা নাই৷ 

আনজন যুৱকৰ নাম কামাৰুল আলম৷ গৃহস্থান হোজাইৰ পৰা স্নাতক ডিগ্ৰী লোৱাৰ পিছত কামাৰুলে মনস্থ কৰিলে অসমৰ বা ভাৰতৰ কলেজৰ পৰা নহয় ডুবাইৰ পৰা এম বি এ কৰিব৷ ডুবাইৰ মনিপাল ইউনিভাৰ্চিটিৰ পৰা সফলতাৰে এম বি এ ডিগ্ৰী লাভ কৰাৰ পৰা কামাৰুলে আৰু পিছলৈ ঘূৰি চাবলগীয়া হোৱা নাই৷

লগে লগে ডুবাইৰ এক সম্ভ্ৰান্ত ব্যৱসায়ী প্ৰতিষ্ঠানত চাকৰিত নিযুক্তি লাভ কৰিলে৷ মধ্যপ্ৰাচ্যৰ দেশকেইখন ওপৰিও,চীন,ফ্ৰান্স আৰু আফ্ৰিকাৰো কেইবাখনো দেশৰ ব্যৱসায়ৰ দায়িত্ব নিয়াৰিকৈ সম্পন্ন কৰাৰ ফলত আজি তেওঁ নিজে এটা আতৰৰ কোম্পানীৰ মেজৰ শ্বেয়াৰহোল্ডাৰ হব পাৰিছে৷ 

অলপতে তেওঁ পেৰিচলৈ ৬মহীয়া প্ৰশিক্ষণত যাব৷দুয়োজন ডেকা যুৱকৰ উত্তৰণৰ কাহিনী ৬৷৭বছৰৰ অধিক কালৰ নহয়৷ ইয়েই প্ৰমাণ নকৰে জানো একাগ্ৰতা আৰু পৰিশ্ৰমে সফলতাৰ আচল চাবি-কাঠী৷ সঁচা কথা-নিজে নিজক সহায় কৰিবলৈ ওলাই অহাজনকহে ভগবানেও সহায় কৰে৷ 

এওঁলোকৰ পৰা আমাৰ অসমৰ যুৱক যুৱতীয়ে অনুপ্ৰেৰণা লাভ কৰক৷ঘৰতে সোমাই নাথাকি বাহিৰৰ বিশ্বত কৰ্ম অনুসন্ধান কৰক আৰু তাৰ বাবে ন্যুনতম অৰ্হতাখিনি আহৰণ কৰক৷ 

ইয়াত মই গম পোৱা মতে কিছুমান ট্ৰেডত সদায় চাকৰিয়ালৰ প্ৰয়োজন হৈয়ে থাকে৷ সেইবিলাকৰ কিছুমান হ'ল এচি টেকনিচিয়ান, ইলেকট্ৰিচিয়ান, ৰেফ্ৰিজিৰেটৰ মেকানিক, কম্পিউটাৰ মেকানিক, অট'মবাইল মেকানিক, কাৰপেন্টাৰ, প্লাম্বাৰ,চেফ আদি৷কিন্তু আটাইতকৈ লাগতিয়াল কথাটো হ'ল- এইবিলাক চাকৰিৰ বাবে কোনো প্ৰতিষ্ঠানৰ ডিপ্লমা আহৰণ কৰিব লাগিব৷তেতিয়া পোনচাতেই চুপাৰভাইজাৰৰ নিযুক্তি পাব আৰু ক্ৰমে পদোন্নতি হব৷ আমাৰ অসমীয়া মানুহৰ বাহিৰে এইবিলাক সুবিধা ভাৰতৰ অইন প্ৰদেশৰ মানুহ লব জানে৷

*৫আগষ্ট,২০১৩ ড'হা, কাটাৰ ফোন ০৯৭৪ – ৩৩৭৩৮৭২২ Email ~ drbksaikia@gmail.com