পলকতে সুখ-দুখৰ বতৰাঃ ৩০ জুলাই

আজিৰ ভাল খবৰবোৰ

১. এছিয়াৰ নোবেলৰূপে খ্যাত সন্মানীয় “ৰমন মেগছেছে বঁটা” এই বৰ্ষৰ বাবে আগবঢ়োৱা হৈছে ভাৰতৰ সমাজ সেৱক অংশু গুপ্তা আৰু এইমছৰ প্ৰাক্তন কাৰ্যবাহী সঞ্জীৱ চতুৰ্বেদীলৈ৷ অংশু গুপ্তাই ভাৰতীয় দান সংস্কৃতিলৈ পৰিৱৰ্তন অনাৰ লগতে কাপোৰক দৰিদ্ৰৰ উন্নয়নৰ সম্পদৰূপে প্ৰতিষ্ঠাৰ বাবে কৰা প্ৰচেষ্টা আৰু সঞ্জীৱ চতুৰ্বেদীক অবাধ দুৰ্নীতি-অনিয়মৰ বাবে কৰি অহা তেওঁৰ সাহসী যুঁজৰ বাবে এই বঁটা আগবঢ়োৱা হৈছে ৷

২. আনন্দৰাম বৰুৱা ভাষা-কলা -সংস্কৃতি সংস্থা (আবিলেক)ৰ উদ্যোগত উত্তৰ পূৰ্বাঞ্চলৰ জনগোষ্ঠীয় ভাষাসমূহৰ সংৰক্ষণ , প্ৰচাৰ আৰু প্ৰসাৰৰ বাবে হাতত লোৱা একাধিক ত্ৰিভাষিক অভিধান প্ৰণয়নৰ অংশৰূপে দেউৰী - অসমীয়া - ইংৰাজী অভিধানৰ তৃতীয় কৰ্মশালা আৰম্ভ হৈছে ৷ এই কৰ্মশালাত সাহিত্য সভাৰ দ্বাৰা অনুমোদিত মুঠ ১৪ জন বিশেষজ্ঞই অংশগ্ৰহন কৰিছে ৷

৩. চাউথ এছিয়ান ফ’ৰাম ফ’ৰ এনভাইৰণমেন্ট নামৰ সংস্থাটোৱে গুৱাহাটী পৌৰ নিগমৰ সহযোগত উত্তৰ পূৰ্বাঞ্চলৰ ভিতৰত প্ৰথমবাৰলৈ নগৰীয়া দুখীয়া লোকৰ বাবে সৌৰশক্তিৰ দ্বাৰা চালিত এটা অনাময় পানী যোগান প্ৰকল্প মুকলি কৰিছে ৷ ইয়াৰ নিৰ্দিষ্ট মেচিনত এ.টি.এম সদৃশ কাৰ্ড ব্যৱহাৰ কৰি এটা পৰিয়ালে এবাৰত দহ লিটাৰকৈ দিনটোত দুবাৰ খোৱাপানী লাভ কৰিব ৷

৪. শেহতীয়া জৰীপ অনুসৰি দৰঙৰ ৰাজীৱ গান্ধী ওৰাং ৰাষ্ট্ৰীয় উদ্যানত বাঘৰ সংখ্যাবৃদ্ধি ভাৰতৰ ভিতৰতে সৰ্বাধিক ৷ ইয়াত বৰ্তমান ২০ টা বাঘৰ লগতে চাৰিটা পোৱালিও আছে ৷ গড়ৰ সংখ্যা বৃদ্ধি হৈছে ১০০টালৈ ৷এনে বৃদ্ধিৰ প্ৰতি লক্ষ্য ৰাখি চৰকাৰে উদ্যানখনক ব্ৰ্যাঘ্ৰ প্ৰকল্পৰূপে গঢ়ি তোলাৰ প্ৰচেষ্টা হাতত লৈছে ৷

৫. নগাওঁ সাহিত্য সভাৰ “কুঁহি”ৰ উদ্যোগত পুৰণি গীত আৰু নৃত্যৰ এখনি কৰ্মশালা সম্পন্ন হৈ যায় ৷ এই কৰ্মশালাৰ সামৰণি অনুষ্ঠানত অংশগ্ৰহন কৰে নুপূৰ মোমাইদেউ খ্যাত শিশু সাহিত্যিক ত্ৰৈলোক্য ভট্টাচাৰ্য ,সাহিত্যিক পেঞ্চনাৰ ডা° দিলীপ কুমাৰ বৰুৱা আদি বিশিষ্ট লোকসকলে ৷

৬. শ্বিলঙৰ “আৰ জি আই আই এমত” সম্পূৰ্ণ নোহোৱা ড° এ পি জে আব্দুল কালামৰ বক্তৃতাৰাজি গ্ৰন্থআকাৰে প্ৰকাশ কৰা হ’ব বুলি তেওঁৰ নিত্য সহচৰ সৃজন পাল সিঙে কলকাতাত ঘোষণা কৰে ৷

৭. অসম চৰকাৰৰ সাংস্কৃতিক সঞ্চালকালয়ৰ সহযোগত “পঞ্চসুৰে” গণশিল্পী খগেন মহন্তৰ ৭৪ সংখ্যক জন্মদিন ১৭ আগষ্ট “গণগীতৰ দিন” ৰূপে উদযাপনৰ আয়োজন কৰিছে৷ এই অনুষ্ঠানত বিগত বৰ্ষৰ দৰে “ফ’ক বিটছ”ৰ দ্বাৰা কালীৰাম বৰাৰ সোঁৱৰণত লোকশিল্পী কুলেন বৰাক সম্বৰ্দ্ধনা জনোৱাৰ লগতে ১০০০০ টকাৰ আৰ্থিক অনুদান আগবঢ়োৱা হ’ব৷

৮. পাঠশালাৰ মুগুৰীয়া ভাতৃ সংঘৰ বাকৰিত বিশিষ্ট শিক্ষাবিদ, সমাজকৰ্মী- লেখক প্ৰমোদ শৰ্মাৰ “মানৱতাৰ মৃতদেহ” নামৰ গ্ৰন্থখন উন্মোচন কৰে অসম সাহিত্য সভাৰ প্ৰাক্তন কাৰ্যনিৰ্বাহক ,সাহিত্যিক গিৰীশ পাটগিৰীয়ে৷

৯. চলচিত্ৰ নগৰী মুম্বাই ,দিল্লী , বাংগালুৰুৰ পিছত ভাৰতৰ চতুৰ্থটো উন্নত কাৰিকৰী পদ্ধতিৰ লেজাৰ প্ৰ’জেক্টৰসমৃদ্ধ “ড্ৰীম থিয়েটাৰ” নামৰ থ্ৰী ডি চিনেমাগৃহটো মঙলদৈত দৰঙৰ উপায়ুক্ত মনোজ কুমাৰে আনুষ্ঠানিকভাৱে মুকলি কৰে।

১০. পূৰ্বাঞ্চল তাই সাহিত্য সভাৰ সভাপতি ,শিক্ষাবিদ ড° দয়ানন্দ বৰগোহাঞিক অসম চৰকাৰে ডিব্ৰুগড় বিশ্ববিদ্যালয়ৰ কাৰ্যবাহী পৰিষদৰ সদস্য হিচাপে মনোনীত কৰিছে