মনৰ কথাঃ পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন :: কিশোৰ কুমাৰ কলিতা - অসমীয়াৰ সুখ-দুখ

xukhdukh.com :: Asomiyar xukhdukh - অসমীয়াৰ সুখ-দুখ :: ইউনিকোডত প্ৰকাশিত প্ৰথম অসমীয়া অনলাইন দৈনিক :: প্ৰতিদিন আপডেট | Content Rich Assamese online Daily / portal /e magazine: ভাল খবৰ, প্ৰৱন্ধ, বিশ্লেষণ, গ্ৰন্থ-আলোচনা, হাস্য-ব্যংগৰে সমৃদ্ধ...

মহীৰূহৰ লেখা

মনৰ কথাঃ পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন :: কিশোৰ কুমাৰ কলিতা

মনৰ কথাঃ পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন :: কিশোৰ কুমাৰ কলিতা

Share This
পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন
কিশোৰ কুমাৰ কলিতা
পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন কিশোৰ কুমাৰ কলিতা, parag kumar das, xukhdukh, assamese
পৰাগ কুমাৰ দাসৰ লগত আমাৰ ব্যক্তিগত যোগাযোগ নাছিল৷ তেখেতৰ দ্বাৰা সম্পাদিত কাকত আৰু আলোচনীত দুই এখন চিঠি, প্ৰবন্ধ আদি জমা দিয়াৰ অজুহাতত দুবাৰ মান তেখেতৰ সান্নিধ্য লাভ কৰিছিলো যদিও সেই সান্নিধ্য আছিল তেনেই খন্তেকীয়া৷ কিন্তু এগৰাকী অনুৰাগী হিচাপে আমাৰ সম্পৰ্ক আছিল দীৰ্ঘদিনীয়া৷ কলেজীয়া দিনৰপৰা আমি যেতিয়া কাকত-পত্ৰৰ ছপা আখৰৰ প্ৰতি দুৰ্বাৰ আকৰ্ষণ অনুভৱ কৰিছিলো তেতিয়া সেই আকৰ্ষণৰ অন্যতম মধ্যমণি আছিল পৰাগ কুমাৰ দাস৷ তেখেতৰ নিৰ্ভীক আপোচহীন লেখাই আমাৰ দৰে সাধাৰণ পাঠকক দিছিল গভীৰ অনুপ্ৰেৰণা৷
পৰাগ কুমাৰ দাসঃ নিৰ্ভীকতা বনাম ন্যায়ৰ প্ৰশ্ন কিশোৰ কুমাৰ কলিতা, parag kumar das, xukhdukh, assamese
যিদিনাখন পৰাগ কুমাৰ দাসক গুৱাহাটীৰ মাজমজিয়াত হত্যা কৰা হৈছিল সেই সময়ত আমি তেজপুৰ বিশ্ববিদ্যালয়ৰ ছাত্ৰ৷ ম’বাইলবিহীন সেই সময়ছোৱাত সেই বাতৰিটো বিয়পি গৈ তেজপুৰ পাবলৈ বেছিপৰ লগা নাছিল৷ খবৰটো পাই শিহৰিত হৈ উঠিছিলো৷ এক ভয় ভাবে ভিতৰৰপৰা মনটো আক্ৰান্ত কৰি আনিছিল৷ বহু বছৰলৈ হাজাৰ-বিজাৰ অনুৰাগীৰ নিচিনাকৈ আমিও মনে-প্ৰাণে কামনা কৰিছিলো অসমৰ সংবাদ ইতিহাসৰ সেই নিষ্ঠুৰ হত্যাকাণ্ডৰ হত্যাকাৰীয়ে এদিন হ’লেও শাস্তি পাব৷ পৰাগ কুমাৰ দাসৰ নিঠৰুৱা পৰিয়ালটোৰ লগতে অসমবাসীৰ মনৰ মাজত জ্বলি থকা ক্ষোভৰ জুইকুৰা অলপ হ’লেও প্ৰশমিত হ’ব৷ নাই নহ’ল৷ বিচাৰৰ কাঠগৰাত কোনো লোককে পৰাগ কুমাৰ দাসৰ হত্যাকাৰী হিচাপে প্ৰমাণ কৰিব পৰা নগ’ল৷ এজন নিৰ্ভীক, নিৰপেক্ষ অসমীয়া সাংবাদিকে ডেকা বয়সতে গুৱাহাটী মহানগৰীৰ মাজমজিয়াত প্ৰাণ হেৰুৱালে, অথচ কোনে তেওঁক হত্যা কৰিলে সি সাক্ষ্যৰ অভাৱত প্ৰমাণ নহ’ল৷ অলেখ বিচাৰবিহীন হত্যাকাণ্ডৰ এটা হৈ ৰ’ল পৰাগ কুমাৰ দাসৰ হত্যাকাণ্ড৷

১৯৯৬ চনৰ ডিচেম্বৰ মাহত এবাৰ গুৱাহাটীলৈ যাওতে গুৱাহাটী বিশ্ববিদ্যালয়ৰ চৌহদত বান্ধৱী এগৰাকীক লগ পাইছিলো৷ সেই সময়ত দুখনমান কাকতত আমাৰ লেখা মাজে সময়ে প্ৰকাশ পায়৷ বান্ধৱী গৰাকীয়ে কৈছিল - ‘‘চাবা, লেখা-মেলাত সাৱধান হ’বা৷ নহ’লে কেতিয়া পৰাগ দাসৰ লেখিয়াকৈ গুলি খাই মৰিব লগা হয় তাৰ ঠিক নাই৷’’ বান্ধৱীজনীৰ কথাষাৰে মনত এক ধৰণৰ ভীতিগ্ৰস্ততাৰ সৃষ্টি কৰিছিল যদিও লেখক-সাংবাদিকক নিৰ্বিচাৰে হত্যা কৰা, জেলত ভৰাই থোৱাৰ এক কলুষিত পৰিবেশ সেই সময়ত ব্যাপকৰূপত সৃষ্টি হোৱা নাছিল বাবে মনৰ মাজৰ ভীতিক নিয়ন্ত্ৰণত ৰাখিব পাৰিছিলো৷ মনক সাbLনা দিছিলো যে দেশৰ গণতান্ত্ৰিক পৰিবেশটোত মত প্ৰকাশৰ স্বাধীনতা বৰ্তি আছে বাবে যেতিয়ালৈ পাৰো তেতিয়ালৈ লিখিম৷ পৰাগ কুমাৰ দাসৰ নিচিনা বলিষ্ঠ, নিৰ্ভীক লিখনি নহ’লেও যতদূৰ সম্ভৱ নিজৰ সামৰ্থ্য অনুসৰি লিখি যাম৷

পৰিতাপৰ কথা যে আজিৰ ভাৰতবৰ্ষত আটাইতকৈ সন্ত্ৰস্ত আৰু ভয়াৰ্ত জীৱন অতিবাহিত কৰিব লগা হৈছে লেখক- সাংবাদিকসকলে৷ চৰকাৰক সমালোচনা কৰি কিবা এটা ক’লেই বা কিবা এটা লিখিলেই কেতিয়া জেললৈ যাব লাগে অথবা আইনী মেৰপাকত সোমাই পৰিব লাগে তেনে অনিশ্চিয়তাৰ মাজতে দিন অতিবাহিত কৰিব লগা হৈছে দেশখনৰ লেখক-সাংবাদিক সকলে৷ কমিটি টু প্ৰটেক্ট [Committee to Protect Journalists] শীৰ্ষক সংস্থাটোয়ে প্ৰকাশ কৰা এক প্ৰতিবেদন অনুযায়ী ২০২২ বৰ্ষটো সাংবাদিসকলৰ বাবে আছিল এক ভয়ানক বছৰ৷ এই বৰ্ষত সৰ্বমুঠ ৬৭ গৰাকী সাংবাদিক-প্ৰচাৰ মাধ্যমৰ কৰ্মীক ভাৰতবৰ্ষত হত্যা কৰা হৈছিল বুলি প্ৰতিবেদনখনত প্ৰকাশ কৰা হৈছিল৷ ২০১৮ চনৰ পাছত এই সংখ্যা আছিল সৰ্বোচ্ছ আৰু ২০২১ ৰ তুলনাত প্ৰায় ৫০ শতাংশ বেছি৷ হত্যা কৰা সাংবাদিক-সংবাদকৰ্মীৰ ভিতৰত ৪১ গৰাকীকে তেওঁলোকৰ বৃত্তিৰ সৈতে জড়িত বিষয়ত হত্যা কৰা হৈছিল বুলি প্ৰতিবেদনখনত কোৱা হৈছিল৷ ২০২২ বৰ্ষৰ শেহৰ ফালে নিউজলণ্ড্ৰী [Newslaundry] নামৰ সংবাদ সংস্থাটোৱে সাংবাদিকসকলকক পাৰ হৈ যোৱা বছৰটো আৰু ২০২৩ চনৰ বাবে তেওঁলোকৰ আশাৰ বিষয়ে সোধতে এজন সাংবাদিকে কৈছিল - ‘‘এজন সাংবাদিকৰ কৰ্তব্য হ’ল সদায় ব্যৱধানবোৰৰ বিষয়ে প্ৰশ্ন কৰা আৰু সেইবোৰ উদঙাই দিয়া৷ এতিয়া সাংবাদিসকলৰ বাবে এক ভয়ৰ পৰিবেশ বিৰাজমান৷’’ সচাঁকৈ আজি দেশখনত সৰ্বত্ৰ সাংবাদিক-লেখকসকলে প্ৰশ্ন কৰিব নোৱৰা এক ভয়ৰ মাজতে নিজৰ দায়িত্ব পালন কৰিব লগা হৈছে৷
[লেখকৰ ই-mail : kishorassam@gmail.com]

No comments:

Post a Comment