মিছা ক'লে কি ডাল হব? (হাস্য ব্যংগ) - অসমীয়াৰ সুখ-দুখ

ইউনিকোডত প্ৰকাশিত অনলাইন দৈনিক

xukhdukh.com

Post Top Ad

Responsive Ads Here

মিছা ক'লে কি ডাল হব? (হাস্য ব্যংগ)

Share This
ঘাইপথত এভেলভেল মাছৰ কথাৰে...
ঈশানজ্যোতি বৰা
জাকৈ,খালৈ অথবা জালখন লৈ অসমৰ খাল-বিল,পুখুৰীত নামি মূৰৰ ঘাম মাটিত পেলোৱাৰ সেই কষ্টভাগ এতিয়া তল পৰিছে৷ ৰাইজৰ উন্নতি সাধনেই জীৱনৰ মহাব্ৰত হিচাপে গণ্য কৰা তেৰাসৱৰ কৃপাত অসমৰ কেইবাটাও ৰাষ্ট্ৰীয় ঘাঁইপথত এতিয়া সৃষ্টি হৈছে সুগভীৰ,সুবিশাল পুখুৰীৰ৷ কোনোবাই এতিয়া ‘অসমৰ বাট-পথৰ অৱস্থা তথৈবচ’ বুলি গোচৰ তৰিলে নহ’ব৷ হাৰে !! অভিযোগৰ বাকচকেইটা মোকলাই কিমাননো আৰু নিৰাশাবাদী মনোভাৱেৰে আস্ফালন কৰি থাকে ! কিমাননো আৰু নিগেটিভিটিবোৰ ৰাজ্যত বিয়পায় ! বি প’জিটিভ্ য়াৰ, মিছা ক'লে কি ডাল হবহে!

অনাগত দিনবোৰত আমাৰ অসমৰ দৰে উন্নত মুলুকত নিৰাশা-হতাশাৰ বিষবাষ্প বিয়পোৱা এনে কথা-বতৰা পৰিহাৰ কৰি নচলিলে চোলাৰ পিছফালে ‘কমপ্লেইন বক্স’ৰ লেবেল যে লাগিব সেইয়া আজিৰ তাৰিখত একেবাৰে খাটাং৷ অসমৰ ইটোমূৰৰ পৰা সিটোমূৰলৈ বাছ-যাত্ৰা কৰাৰ আগমুহূৰ্তত যাত্ৰীসমাজে এতিয়া আহল-বহল মোনা এটা লগত লৈ আনিবলৈ পাহৰিব নালাগে৷ কাৰণ, নিৰ্দিষ্ট কিলোমিটাৰৰ অন্তৰে অন্তৰে ঘাঁইপথৰ বুকু ফাটি জিলিকি থকা পুখুৰীবোৰত এতিয়া ৰৌৰ পৰা খলিহনালৈকে,মাগুৰৰ পৰা গৰৈ-কাৱৈলৈকে নানাতৰহৰ, নানবৰণৰ মাছে “মোক ধৰ, মোক খা’ বুলি শ্ল’গান জুৰিব লাগিছে৷ গতিকে সন্ধ্যা মোনা দাঙি দাঙি চাৰিআলি,তিনিআলিৰ দৈনিক বজাৰৰ পৰা তিনিশ-চাৰিশ টকাৰে চালানী মাছ খোৱাৰ আমনিদায়ক পৰম্পৰাফেৰা পৰিত্যাগ কৰি ৰাষ্ট্ৰীয় ঘাঁইপথৰ অতিকায় পুখুৰীকেইটালৈ মনোযোগ দিলে ৰাইজে একেবাৰে ফ্ৰেছ্ মাছৰে নিশাৰ ব্যঞ্জন খাই পৰিতৃপ্তি পাব৷

সিপিনে,আজি আন এজন অতিপাত যোগাত্মক দৃষ্টিভংগীসম্পন্ন মানুহে কৈ গ’ল বোলে-অসমৰ চিকিৎসালয়ত ৰোগীসকল মজিয়াত পৰি থকা কাৰ্যভাগে বোলে অসমৰ উন্নয়নৰ কথাকেই সূচায়৷ ইতিবাচক চিন্তাধাৰাৰ ইয়াতকৈ আৰু উজ্জ্বল দৃষ্টান্ত কি হ’ব পাৰে! অতিৰঞ্জিত নকৰাকৈ ব্যক্ত কৰোঁ যে- এনেধৰণৰ আশাব্যঞ্জক কথা-বতৰাই আমাৰ মনৰ আকাশৰ অমাৱস্যাৰ ঘোৰ অন্ধকাৰক “শিশুপাল খেদা” দি পূৰ্ণিমাৰ নিৰ্ভেজাল পোহৰেৰে এতিয়া দশোদিশ পোহৰাই তুলিছে৷ নিঃসন্দেহে অসমৰ চৌদিশে এতিয়া ‘যোগাত্মক দৃষ্টিভংগী’ৰ এক অভূতপূৰ্ব পৰিৱেশে বিৰাজ কৰিছে৷

ইতিবাচক মনোভাৱেৰে, যুগান্তকাৰী চিন্তাধাৰাৰে বলিয়ান হৈ বিগত বছৰসমূহত অসমত সংঘটিত হোৱা “মহা-উন্নয়ন” আৰু “মহা-প্ৰগতি”ৰ জয়ঢোলকেইটা আপোন-পাহৰা হৈ সৰ্বশক্তি প্ৰয়োগ কৰি কোবোৱাৰ উপযুক্ত সময় এইয়া৷ এৰা,প্ৰভাত হ’বই৷ আকৌ এদিন প্ৰভাত হ’বই হ’ব৷ আশাবাদৰ এনেহেন বিষ্ফোৰণৰ যুগত আমি আৰু আশাবাদী নহৈ পাৰোঁনে?

এই শুভক্ষণত সুঁৱৰিবলৈ বাধ্য হৈছোঁ সেই কালজয়ী বাক্যকেইফাঁকি- “বাজক দবা,বাজক শঙ্খ, বাজক মৃদং খোল; অসম আকৌ উন্নতি-পথত, ‘জয় আই অসম’ বোল। ঘাইপথৰ মাছকে ভাজো, তেলৰ বটল খোল! মিছা ক'লে কি ডাল হবহে!

No comments:

Post a Comment

Post Bottom Ad

Responsive Ads Here

Pages