Friday, May 23, 2014

ব্যতিক্ৰমী পদক্ষেপঃ

মুম্বাইৰ সুউচ্চ অট্টালিকাত পিজ্জা দিবলৈ আহিল উৰণীয়া ড্ৰোণ
অসমৰ মানুহৰ বাবে উৰণীয়া ড্ৰোণ বা মানৱ-বিহীন আকাশীযানৰ বাতৰিটো বিশেষ অপৰিচিত নহয়। তথাপি সোঁৱৰাই দিবই লাগিব যে অসমৰ বন বিভাগে এনে বিশেষ ড্ৰোণৰ ব্যৱহাৰ কৰি কাজিৰঙাত গঁড় হত্যা ৰোধ কৰাৰ বাবে চেষ্টা চলাব বুলি এটি ব্যয়-বহুল প্ৰকল্পৰ কথাই সংবাদ শিৰোনামা লাভ কৰিবলৈ সক্ষম হৈছিল। পিছে এতিয়াও উন্নত প্ৰযুক্তি ব্যৱহাৰ কৰি বা আধুনিক অস্ত্ৰৰে সজ্জিত বনকৰ্মী নিয়োগৰ ঘোষণাৰ পাছতো গঁড় হত্যা ৰোধ নোহোৱাটো অতি পৰিতাপৰ কথা। 


পুনৰ চিনেমা চাই ভালপোৱা পাঠক সকলক সোঁৱৰাই দিব খুজিছো আমিৰ খান অভিনীত জনপ্ৰিয় ছবি "থ্ৰী-ইডিয়টচ"ৰ কথা। এই ছবিতো এজন ইঞ্জিনীয়াৰিঙৰ ছাত্ৰই প্ৰকল্প হাতত লৈ উৰি ফুৰা ড্ৰোণ সাজি উলিয়াবলৈ যথেষ্ট কষ্ট কৰে। পাছত আমিৰ খানে নিজা উদ্ভাৱনী শক্তিৰ প্ৰয়োগ কৰি সেই প্ৰকল্পটো সম্পূৰ্ণ কৰে। উৰণীয়া যানখনত সমৃদ্ধ কৰা কেমেৰাৰে উচ্চ বহুমহলীয়া ঘৰতো চোৰাংচোৱাৰ দৰে পৰ্যবেক্ষণ ৰখাৰ বাবে ইয়াক ব্যৱহাৰ কৰিব পাৰি। পিছে চিনেমাখনত এই ড্ৰোণৰ প্ৰথমটো সফল পৰীক্ষামূলক উৰণতেই প্ৰকল্পটো সময়মতে সম্পূৰ্ণ কৰিব নোৱাৰি হতাশাত ভোগা "উদ্ভাৱনী শক্তিৰে উজ্জীৱিত" প্ৰতিভাধৰজনক চিলিঙ ফেনত ওলমি আত্মহত্যা কৰাৰ দৃশ্যটোহে পৰ্যবেক্ষণ কৰিব লগা হয়। যিটো দৃশ্যই দৰ্শক সকলক বাকৰুদ্ধ কৰি তোলে।

তেনে এক উদ্ভাৱনী চিন্তাৰেই ৰাষ্ট্ৰীয় সংবাদ মাধ্যমত শিৰোনাম দখল কৰিলে মুম্বাই চহৰৰ ল'ৱাৰ পাৰেল অঞ্চলৰ স্থানীয় পিজ্জা বিপনী ফ্ৰান্সিচকোচ পিজ্জেৰিয়াই। ল'ৱাৰ পাৰেলৰ পৰা ডেৰ কিল'মিটাক নিলগৰ ৱৰ্লী অঞ্চলৰ এটি বহুমহলীয়া বিল্ডিঙত ৰিমট কণ্ট্ৰলৰ সহায়েৰে নিয়ন্ত্ৰণ কৰা এখন ড্ৰোণ উৰণীয়া যানে সফলতাৰে উৰি গৈ গ্ৰাহকজনক অৰ্ডাৰ দিয়া পিজ্জা ঘৰত পহোচাই দিয়ে। পিছে এই সফলতাক উদযাপন কৰিবলৈ লোৱা পিজ্জেৰিয়াৰ কৰ্তৃপক্ষৰ বিৰুদ্ধে মুম্বাইৰ পুলিচেহে অপৰাধমূলক এক গোচৰ ৰূজু কৰিছে। এয়াৰ ট্ৰেফিক কণ্ট্ৰলাৰ কৰ্তৃপক্ষৰ অনুমতি নোলোৱাকৈ এনে পৰীক্ষামূলক উৰণীয়া যান উৰুওৱাৰ বাবে এতিয়া কাৰণ দৰ্শোৱা জাননী পিজ্জেৰিয়াৰ কৰ্তৃপক্ষলৈ আৰক্ষীয়ে জাৰি কৰিছে।

যোৱা ১১মে'ত এই পৰীক্ষামূলক হোম-ডেলিভাৰীৰ সফলতা দাবী কৰা ৰেষ্টুৰাৰ মুখ্য-কাৰ্যবাহী বিষয়া মাইকেল ৰজনীয়ে ভৱিষ্যতে নিয়মিত ভাৱে এনেদৰে পিজ্জা ডেলিভাৰীৰ ব্যৱস্থা কৰিব পৰা যাব বুলি প্ৰকাশ কৰিছে। পিছে এতিয়া এনে ৰিম'ট কন্ট্ৰ'ল পৰিচালিত মানৱ-বিহীন এনে মাইক্ৰ উৰণ যানক অপৰাধমূলক বা সন্ত্ৰাসবাদী কাৰ্যতো ব্যৱহাৰ হব পাৰে বুলি আৰক্ষীয়ে শংকা প্ৰকাশ কৰিছে। পিজ্জেৰিয়াৰ ফালৰ পৰা জাননীৰ উত্তৰ পোৱাৰ পাছতহে এই বিষয়টোত পৰবৰ্তী পদক্ষেপ কি হব সেয়া নিৰ্ণয় হব বুলিও আৰক্ষীয়ে প্ৰকাশ কৰিছে।

টোকাঃ ডমিন'জ কোম্পানীয়েও বিদেশত এনে ড্ৰোণৰ পৰীক্ষামূলক উৰণ সম্পন্ন কৰিছিল। সেই উৰণৰ ভিডিঅ' চাবৰ বাবে তলৰ সূত্ৰত ক্লিক কৰকঃ https://www.youtube.com/watch?v=ZDXuGQRpvs4

No comments:

Post a Comment