পলকতে সুখ দুখৰ বতৰা - অসমীয়াৰ সুখ-দুখ

ইউনিকোডত প্ৰকাশিত অনলাইন দৈনিক

xukhdukh.com

Post Top Ad

Responsive Ads Here

পলকতে সুখ দুখৰ বতৰা

Share This
আজিৰ ভাল খবৰবোৰ
১. বিশিষ্ট উদ্ভাৱক উদ্ধৱ ভৰালীলৈ অসম কৃষি বিশ্ববিদ্যালয়ে আগবঢ়াইছে সন্মনীয় ডক্টৰেট ডিগ্ৰী৷ লগতে নতুন দিল্লীস্থ ভাৰতীয় কৃষি গৱেষণা পৰিষদৰ সঞ্চালকপ্ৰধান ডঃ এছ আয়াপ্পানকো এই সন্মান প্ৰদান কৰিব বুলি প্ৰকাশ কৰিছে৷
২. পৰম্পৰা অক্ষুন্ন ৰাখি বৰপেটা সত্ৰত ১৫-১৭ মাৰ্চলৈ ধৰ্মীয় আৰু লৌকিক পৰম্পৰাৰে তিনিদিনীয়াকৈ পালন কৰাৰ প্ৰস্তুতি চলাৰ সুখবৰ৷ প্ৰথম দিনটো গন্ধযাত্ৰা, দ্বিতীয় দিনটো ভৰদৌল ৰূপে আৰু শেষৰ দিনটোক ফাঁকুৱা বা সুৱেৰী উৎসৱৰূপে পালন কৰা হব৷

৩. অসমত চাৰিখন আসনৰ বাবে উমৈহীয়া প্ৰাৰ্থী ঘোষণা কৰিলে চিপিআই আৰু চিপিআই(এম) দলে৷ এই অনুসৰি যোৰহাটত দ্ৰপদ বৰগোঁহাই, বৰপেটাত উদ্ধৱ বৰ্মন, তেজপুৰত ক্ষেমৰাজ ছেত্ৰী আৰু শিলচৰ ৰেজানন্দ আলী বৰভূঞাই প্ৰতিদ্বন্দিতা কৰি  জনবিৰোধী নীতি, ভ্ৰষ্টাচাৰৰ বাহক কংগ্ৰেছ-বিজেপিৰ বিকল্প শক্তিৰ বাবে সমৰ্থন আদায়ৰ বাবে চলাব চেষ্টা৷

৪. বছৰটোৰ পঞ্চমখন অসমীয়া ছবিৰূপে ৩০টাতকৈ অধিক চিত্ৰগৃহত আজি মুক্তি লাভ কৰিব "ছাঁয়া"ই৷ পচিলাক ৰোহন পাতৰৰ একছনধৰ্মী ছবিখনে সমাদৰ লাভ কৰিব বুলি প্ৰযোজকে আশা প্ৰকাশ কৰিছে৷
 
৫. দীনেশ গোস্বামীৰ কাহিনীৰে প্ৰদ্যুত কুমাৰ ডেকাৰ ৰহস্য চলচ্চিত্ৰ "বৰশী'য়ে মুক্তি লভিব অহা ১৯ এপ্ৰিলত৷ ছবিখনৰ প্ৰচাৰৰ বাবে ব্ৰেণ্ড এম্বেচেদৰ ৰূপে অংশ লব অসমৰ ৰহস্য সাহিত্যৰ সম্ৰাট স্বৰূপ ৰঞ্জু হাজৰিকাই৷

৬. দীৰ্ঘদিন বন্ধ হৈ থকা উত্তৰ-পূৰ্বাঞ্চলৰ প্ৰথমখন ফাৰ্মাচী বিষয়ক আলোচনী "ফাৰ্মালাইন" পুনৰ প্ৰকাশৰ প্ৰস্তুতি চলিছে৷ নতুন ৰূপত আলোচনীখন অহা ২৫ ছেপ্তেম্বৰত ফাৰ্মাচিষ্ট দিৱসৰ দিনা প্ৰকাশ কৰা হব৷ উক্ত দিনাই এই স্মাৰক বক্তৃতাৰো আয়োজন কৰা হব বুলি ফাৰ্মালাইট প্ৰকাশনে প্ৰকাশ কৰিছে৷

৭. সাহিত্য ক্ষেত্ৰলৈ আগবঢ়োৱা অৱদানৰ বাবে বাংলা কবি স্বৰ্ণালী বিশ্বাস ভট্টাচাৰ্যক চলিত বৰ্ষৰ যুগশংখ সাহিত্য পুৰস্কাৰৰ বাবে নিৰ্বাচিত কৰা হৈছে৷ অসমৰ চাৰিগৰাকী যুৱ সাংবাদিককো যুগশংখ গোষ্ঠীয়ে বিশেষ বঁটাৰে সন্মানিত কৰিব৷ চেমিম চুলতানা আহমেদ, মনজুৰ আহমেদ বৰভূঞা, নৱজ্যোতি পাঠক আৰু মৌচম আকনলৈ নগদ ২৫হাজাৰ টকাৰ লগতে মানপত্ৰৰে সন্মানিত কৰা হব৷ এই বঁটা অহা ২৩মাৰ্চত শিলচৰত প্ৰদান কৰা হব৷

৮. দেশৰ অনাগত লোকসভা নিৰ্বাচনত ক'লা টকাৰ ব্যয়ৰ সন্দৰ্ভত চোকা দৃষ্টি ৰাখিব নিৰ্বাচন আয়োগে৷ এই উদ্দেশ্যে দেশত মুঠ ৭০০গৰাকী নিৰ্বাচনী ব্যয় পৰ্যবেক্ষক নিয়োগ কৰিব বুলিও প্ৰকাশ পালে বাতৰি৷

৯. ভূপালত কালিৰে পৰা আৰম্ভ হোৱা চতুৰ্থ হকী ইণ্ডিয়া ৰাষ্ট্ৰীয় ছিনিয়ৰ মহিলা হকী প্ৰতিযোগিতাত অসমৰ মহিলা দলে গোৱাক ১৭-০ গ'লৰ ব্যৱধানত এক বৃহৎ জয় সাব্যস্ত কৰিলে৷ আজি দলটোৱে বংগৰ দলৰ বিৰু্দ্ধে খেলত অৱতীৰ্ণ হব৷

১০.  অসমত এইবাৰ নিৰ্ণায়ক ভূমিকা ল'ব যুৱ ভোটাৰে, মুঠ ভোটাৰৰ ৪৬.৬% ভোটাৰ ১৮-৪০ বছৰৰ ভিতৰত৷ আধুনিক শিক্ষাৰে শিক্ষিত, টিভি, বাতৰি-কাকত, চ'চিয়েল মেডিয়াৰ সৈতে সম্পৰ্ক থকা এই নতুন প্ৰজন্মই লোৱা ৰাজনৈতিক সিদ্ধান্ত দেশৰ ভৱিষ্যতৰ বাবে অতি গুৰুত্বপূৰ্ণ হব বুলিও বিশ্লেষকে মত পোষণ কৰিছে৷

১১. কাজিৰঙাত গঁড় চিকাৰৰ উদ্দেশ্যে অহা তিনিজনকৈ চোৰাং চিকাৰীক বিশ্বনাথ চাৰিআলিত আৰক্ষীয়ে আটক কৰিছে৷ এওঁলোকো এই উদ্দেশ্যে ডিমাপুৰৰ পৰা আহি বিশ্বনাথ চাৰিআলিত গোপনে বাহৰ পাতিছিলহি বুলি জানিব পৰা গৈছে৷

১২. নিৰ্বাচনী পুঁজি সংগ্ৰহৰ উদ্দেশ্যে নিৰ্বাচনী বিধি উলংঘা কৰিও জলম্পদত ১০০০কোটিৰ প্ৰকল্পৰ নিবিদা গ্ৰহণৰ ষড়যন্ত্ৰ প্ৰশাসন আৰু সাংবাদিকে ফাদিল কৰাত এই প্ৰক্ৰিয়া বাতিল কৰিবলৈ বিভাগটো বাধ্য হোৱাৰ খবৰে পালে সংবাদ শিৰোনামা৷

১৩. দিল্লীৰ দেশ কঁপোৱা ২০১২চনৰ ১৬ডিচেম্বৰৰ গণ ধৰ্ষণৰ ঘটনাৰ গোচৰত চাৰিওজন অপৰাধীৰে মৃত্যুদণ্ড বাহাল ৰাখিলে দিল্লী উচ্চ ন্যায়ালয়ে৷ নিম্ন আদালতৰ ৰায়ৰ প্ৰত্যাহ্বান জনাই উচ্চ ন্যায়ালয়ত কৰা আবেদনৰ শুনানি গ্ৰহণ কৰি আদালতে এই ৰায় প্ৰদান কৰিছে৷

১৪.  দৰং জিলাৰ জাপমৰাবড়িৰ একমাত্ৰ উচ্চ শিক্ষানুষ্ঠান জাপমৰাবড়ি উচ্চ মাধ্যমিক ৰূপালী জয়ন্তী আজিৰে পৰা ১৬মাৰ্চলৈ বৰ্ণাঢ্য কাৰ্যসূচীৰে উদযাপন কৰা হব৷

১৫ . ই এছ পি এন ক্ৰিক ইনফোৰ "প্ৰজন্মৰ ক্ৰিকেটাৰ" বঁটাৰ বাবে বিবেচনাৰ শীৰ্ষ তালিকাত স্থান পাইছে শচীন টেণ্ডুলকাৰে৷ ১৯৯৩ৰ পৰা ২০১৩ৰ ভিতৰৰ আটাইতকৈ দুৰত্ন ক্ৰিকেটাৰ জনক এই সন্মান এক অনুষ্ঠানত মুম্বাইত আজি প্ৰদান কৰাৰ আয়োজন চলিছে৷

১৬. প্ৰতিষ্ঠানবিৰোধী ঢৌত উটি যোৱাৰ আংশকাত পৰাজয় বৰণৰ পৰা হাত সাৰিবলৈ কেইবাজনো কেন্দ্ৰীয় মন্ত্ৰীয়ে লোকসভা নিৰ্বাচনত এইবাৰ অংশ নলয় বুলি প্ৰকাশ পাইছে সম্ভাৱনা৷ এই তালিকাত কপিল ছিৱাল, পি চিদাম্বৰম, শচীন পাইলটৰ নাম সন্নিবিষ্ট হৈছে বুলি জানিব পৰা গৈছে৷

No comments:

Post a Comment

Post Bottom Ad

Responsive Ads Here

Pages